مساء النور عزيزي
اول شي حاب اقولك ان هالمرحلة اتوقع الكل مر فيها ومنهم انا.. اول ما دشت في راسي الفكرة وكنت متحمس قمت ابحث عن عمليات الزراعة لاني كنت ما اعرف ولا شي عن طريقة العملية.. ومن زود ما حظي نحس اول عملية زراعة جفتها في يوتيوب كانت بطريقة الشريحة ههههههههههههههه على طول غيرت رايي وقلت خلني على الزلوف اهون بلا لحية بلا كلام فاضي احسن من يقصون جزء راسي هههههههههه.. بعدها بفترة قمت ابحث اكثر عن طرق زراعة الشعر وعرفت ان فيه طريقة الاقتطاف واتطمنت ومع البحث في النت وصلت للمنتدى هذا وعرفت كل اللي ابيه واستعديت نفسيا وتوكلت على الله.
بالنسبة لفترة ما بعد العملية
الانتفاخ : يختفي في اول اسبوع ويرجع وجهك مثل قبل.
الاحمرار : يعتمد على نوع بشرتك.. وحتى لو طول معاك تراه مو مثل ما انت متخيل يعني محد راح يلاحظه الا اذا قرب منك وقعد يدقق.. يعني ما يلفت النظر لدرجة ان اللي يجوفك على طول يعرف او يحس بشي غريب
وبالنسبة للعملية والناس تعرف او ما تعرف
الناس المقربين لك واللي عايشين وياك شي طبيعي انهم راح يعرفون.. وربعك اللي تجوفهم كل يوم لو كل يومين بعد شي طبيعي انهم بيعرفون اما بالنسبة للناس اللي ما تجوفهم واجد لا تحاتي محد بيعرف لانهم ما لاحظوا التغيير المفاجئ.
وبالنسبة للناس اللي ما تعرفهم فما اعتقد ان راح يعرف انك مسوي عملية يعني بعد ما تتساقط القشور ( بعد اسبوعين من العملية ) بيكون الشكل مقبول انك تطلع وتروح وتجي.. يعني مستحيل تمر على واحد في الشارع ويعرف انها عملية ( الا اذا كان مسوي زراعة من قبل او عنده خلفية عن العملية يمكن يعرف )
اذا صار لك 25 يوم من العملية او شهر في هالفترة بيكون الشعر تساقط وقلت كثافته لكن الاحمرار بيعطي مظهر ان اللحية للحين محددة كامل( انا بالنسبة لي الاحمرار كان خفيف الحمدلله في هالفترة وكان يعطي مظهر اني مخفف اللحية وطبعا فيه شعر موجود ما تساقط فاخففه بالمقص او المكينه عشان الشكل يكون مرتب اكثر والامور ماشية طبيعي الحمدلله)
في النهاية احب اقولك اذا انت ملزم ع العلمية توكل على وسوها ولا تخلي التفكير يغير رايك.. هي كلها فترة بسيطة وتعدي وبعدها ترتاح نفسيا طول عمرك.. وحالة الوسواس هذي شي طبيعي بس في النهاية بتكتشف انك مضخم الموضوع زيادة عن اللزوم وبتجوف الوضع طبيعي وردة فعل الناس بتكون غير عن اللي في بالك.. بالنسبة لي انا اول ما رجعت ديرتي وطلعت مع الشباب كنت متردد اطلع قلت لهم خلنه نقعد في مكان نسولف وخلاص ( لاني كنت خايف ان الكل يجوفني ويقعد يطالعني بنظرات غريبة ) لكن طلعت واكتشف ان محد معبرني وداري عن هوا داري ههههههههههههه والامور كلها طبيعية ولا جنه صاير شي فزادت فيني الثقة وتغلبت على الوسواس واكتشفت اني اوسوس لاني اعرف اني مسوي عملية .
في النهاية بالتوفيق لك ومسامحة طولت في الرد
تحياتي