السلام عليكم و رحمه الله و بركاته
لا اله الا الله و حده لا شريك له, له الحمد و له الملك و هو على كل شيء قدير.
أنا عمري 32 سنه بدأ تساقط الشعر من رأسي في بدايه العشرينيات من عمري و بدأت بوادر التصليع عند عمر 26 او 27
بدايه البوادر الواضحه كانت مع جانبي مقدمه الرأس يعني مع اطراف الجبهه .. و بعدين بدأ الشعر اللي بينهم ( اللي في الواجهه) يخف و يرتفع خط مقدمه الشعر في السنوات الأربع التاليه بطريقه طرديه و سريعه .. بمعنى اللي على جانبي المنتصف صار تقل صبه ملعب الملز و اللي في المنتصف بدأ يصبح اخف و اضعف ..
الورااثه
الصلع اللي اعاني منه وراثي .اكتشفت هذا و انا قاعد اتقهوى مع اميمتي , الله يطول بعمره و يعطيه الصحه و العافيه و امهاتكم و يرحم الميت منهن. الوالد الله يشفيه و يمده بالصحه والعافيه و والدين السامعين ان شاء الله ويرحم الميت منهم, ما فيه صلع و اخواني ما يعانون منه ما عدا انا. بعد التدقيق و التمحيص التفت على اميمتى وبعفويه صارخا -و يداي يسوون حركه فتيحه ورده سكيره ورده- قائلا " أنا وش سويت ليتس.."
اميمتى بعد ما متصت صدمه الموقف و قبلت يدها وجه وظهرا و متمته بينها وبين نفسها " الله يديم العقل " ..
فلقد اكتشفت ان الصلع جايني من خوالي .. جدي من أمي .. الله يلبسه تاج الصحه و العافيه و يطول بعمره و اعمار السامعين و كل من يعز عليهم .. يعاني من اقصى و اقوى انواع الصلع .. اللي هو على مقياس norwood يكون في class 7 و هذا و انا بعد مجامله ..
و ما عندي الا خال واحد و نسبه الصلع عنده على مقياس norwood يكون في class 3 ..
يعني على بلاطه جين الصلع اللي جاني, جين صافي يمشي km و صفق رويسي بمقتل ...
مقيااس نوروود للشعر
بدايه الفكره,,,
في سنه 2008 بدأت افكر في زراعه الشعر بس المشكله كانت بشيئين :
1- جهلي في الموضوع. ماكنت اعرف اي شخص -في الحياه الحقيقيه- قام بزراعه الشعر. و المرء عدو ما يجهله..
2- التكلفه المرتفعه لها.
طبعاا كل المعلومات اللي ابحث عنها كانت تدور حول ثلاث دول هي امريكا, كنداا, و استراليا ... كانت تتراوح اسعار الجرافت الواحد من خمس الى ثمانيه دولاار. و حسبت الفين جرافت بمعدل 6.5 دولار طلعت معي حول الخمسين الف رياااال بس تكلفه العمليه. فشلت الفكره من رااس و بدأت اقصر شعري على نمره صفر او واحد ,,,
في بدايه هالسنه 2010 قابلت صديق لي اسمه أبو زيااد -الله يرجعه بالسلامه ويسهل له امره- نفس حالتي بس نوع الصلع يختلف. فبدينا نتكلم عن اي شيء يرجع الشعر او علاج سمع عنه او تكلم له احد عنه.. طبعاا انا جربت زيوت تطلع الشعر و خرابيط من هنا و من هناك و لا نفعت. كنت ادري ان ما فيه شيء يرجع الشعر في الصلع الوراثي بس كنت متمسك بطرف امل عسى ربك . فتفقناا انا ما فيه علاج او حل غير زراعه الشعر و بس. بس كلنا معلوماتنا عنه ميح بس معلومات انترنتيه. بعد شهرين وشي اجتمعنا و قال انه قابل دكتور جراح اخصائي زراعه شعر في الرياض اسمه الدكتور جمال جمعه . انا ما كنت اعرف عن هالدكتور فقلت وش الشي اللي يأكدلك انه زين. قال ان معه البورد الاميركي و اشتغل في البفيرلي هيلز قبل يعني في معقل هوليوود. قلت طيب وش قررت تبي تسويهاا .. قال لاا مو الحين لان الصلع لين الحين ماشي ابيه يوقف و بعدين ابداا ..
هذيك الليله عطتني امل ان اذا فكرت اسوي زراعه شعر فا اقدر اسويهاا هناا و بتكلفه اقل من براا . طبعاا كانت تقريباا فوق ال 25 الف مع الدكتور جماال.
الحين الحلم كل ماله يقرب بس توه ما صار حقيقه طبعاا لنفس السببين اللي فوق.
1- التكلفه. ( بس الحين نزلت لنص و بدون مصاريف سفر)
2- الجهل في الموضوع. ( بدأت اجمع معلوماات من هنا و من هنااك بس مافيه شخص اعرفه سوى العمليه بعد)
الكنز
في العشر الاواخر من رمضان الماضي فتحت السيد قوقل و كتبه في صندوق البحث "زراعه الشعر في السعوديه" او شي زي كذا و طحت على موضوع ما هو موضوع و بس الا كنز. السبب انه كنز ان كان فيه اعضاء منهم كنهم يكتبون و هم قاعدين جنبك يتقهون شاهي ..و موثقين مراحل الزراعه من ذكر اسم المركز و الدكتور و كيف تعامله و تكلفه العميله و قبل كل شيء التوثيق بالصور قبل و بعد.
و هذاك الموضوع قادني الى هذا المنتدى.
الاختيار و الاستشاره ..
الاختيار كان على الدكتور بسام جباعي و لأكثر من سبب:
1- تجارب بعض الاعضاء معه و نتائجهم اللي يمدحونها.
2- التكلفه المنخفضه مقارنه مع الدكاتره الباقين.
3- مقابله له على القناه الاولى شفتها له على اليوتوب.
فقررت اني اسوي موعد للاستشاره و قابل الدكتور و اشوف وش يقول عن حالتي . كنت قبل بروح اقابل اكثر من دكتور مثل د.جمال جمعه و د. العجلان و بعدين اقرر على واحد منهم. فكلمت العيادات العالميه لزراعه الشعرفي الليل برمضان علشان اسوي موعد مع الدكتور بساام و اعطوني موعد يوم الاربعاء ب 28 رمضان الساعه 1 الظهر.
اول ما جيت الدكتور كان مرحب و قابلني عند الباب و جلسنا نسولف عن اسم عائلتي يقول الدكتور بسام انتم لكم ناس في لبنان ..في عايله نفس عايلتك في الجنوب بضيعه ما دري وشي ما أذكر وش الأسم اللي قاله الدكتور.. بس اسمها ابد مهو ام العقارب أو ام الجماجم أو ام رضمه ,الله يرج طاش ما طاش. قلت بيني و بين نفسي لو اصلاا لناا ناس هنااك كان شفتني قاعد بهالحر.
الموهم بدأ الدكتور يعاين راسي و اول شي بعد المعاينه لـ الراس سأل فيه صلع في العايل و قلت له ايه جدي من امي و خالي الوحيد بس .. وسأل اني احدد على مقياس norwood اي class احط جدي قلت في السابع .. وخالي في الثالث..
اخذ بعض الصور لراسي بكميرا و بعدين شبكهاا على شاشه تلفزيون و قال لي انت احطك بمقياس norwood في كلاس الخامس ورايح على السادس ...وراني كيف الشعر ضعيف و بدأ فعلياا يتجه لسادس ... طبعاا انا ما عمري شفت شعر راسي من هذي الزاويه فأنصدمت .. دايم في المرايه ما غير اشوف الخشه ومقدمه الراس ... طبعا اول توقعت ان الصلع اللي فيني بس في المقدمه لكن انصدمه بالخلفيه بعد..
الموهم الاخيارات اللي اعطيت لي من قبل الدكتور بسام خيارين و افضل لهم كان نزرع المنطقه الاماميه بتقريبا 1900 جرافت و نستخدم بروبيشيا اللي دائماا ما يكون ناجح في منطقه منبت الشعر في اعلى الراس او crown area
طبعاا انا كنت مطلع على بعض الردود من اعضاء هذا المنتدى عن مؤثرات هذا العلاج السلبيه اللي هي البرود الجنسي فقلت لدكتور عن هذي النقطه و كانت اجابته ان الدراسات اللي تمت على العلاج اعطت تقريبا 3 بالميه عانواا معه العلاج جنسيا لكن اول مايتركون العلاج ترجع الاوضااع بالسليم و اني ماراح اخذ العلاج الا لمده سته اشهر والشي هذا راجع لي اذا انا ودي اخذه او لا.
المهم اخذت المعلومات اللازمه من الدكتور. و جينا لسعر تكلفه العمليه. فقال بخصوص التكلفه هذا تقرره مع المنسقه الماليه مدام عبير و جتنا مدام عبير و رحت معها لمكتبه و اتفقنا على المبلغ يكون ل 1900 جرافت راح يكون بعد التخفيضات اللي مسوينهاا في رمضان 16700 مع خصم سعر الاستشاره و اللي كانت 300 ريال يعني تبي تطلع على العمليه بـ 16400 ريال. فسألت عن اقرب موعد اذا قررت اسويهاا قالت راح يكون في 28 سبتمبر.. قلت طيب ابي لي وقت عشان اقرر قالت اذا قررت بس دق على تلفون و احطك في موعد العمليه بالتاريخ اللي راح يكون.
طبعا دقيت على خويي ابو زياد و قلت له عن المغامره اللي سويتهاا ,,, اول شي قالي ابو زياد شيك مع كذا دكتور قبل.. قلت تدري اني ارتحت لدكتور بساام من الله ... فشكلي ابي اسويهاا عنده الحين و المبلغ هذا عندي الحين و عارف اني اذا ماسويتهاا عنده الحين هالمبلغ بطلع فيه باجازه العيد و اطير نصه اذا مو كله ... و مافيه شي اخسره الا اني خايف من كذا شي:
1- الشريحه اللي يبي ياخذ منها القرافت راح تسبب علامه جرح كبيره في الراس من الخلف.
2- اذا الشعر الباقي غير المزروع بداا يتساقط كيف راح يكون شكل الشعر؟ تخيل بس في مقدمه الراس شعر و حوله برحه .. تصير كنه جزيره بوسط بحر.
فقال ابو زياد بخصوص العلامه للمنطقه المانحه انت تبي تاخذه من الخلف و ما راح يبين على رقم اثنين.
اما بخصوص شكل الشعر لو التساقط رجع للمنطقه اللي حول المزروعه ...فعلى كذاا بستنى الين ما يصير عمري فوق الخمسين ثمن اسوي و انتظر عشرين سنه على امل..
فقال تدري انا اشوفك متحمس توكل على الله .. سكرت من عنده و كلمت العيادات و اخذت موعد على يوم 28 بس قالواا هذا التاريخ مو متوفر بس فيه قبله بيوم 20 سبتمبر .. قلت توكلناا على الله.
الليله قبل العمليه:
دقواا على في اليوم اللي قبل العمليه لتذكير و اعطائي بعض النصائح اللي لازم اسويهاا قبل ما جيهم:
1- اكون متروش و غاسل الشعر بالشامبو.
2- أكل فطور زين.
يوم جيت ابناام جلست من الساعه 11 في الليل الين 2 صباحاا و انا ماغير اوسوس ,, لو صار كذاا او صار كذا.
هل هذا (زراعه الشعر ) قرار سليم او اني استعجلت عليه؟
حتى وصلت مرحله اني متعب و ابي اناام و مااني قادر قلت تدري خلااص بكلمهم الصبح و بكنسل العمليه... و لاا قدرت انااام و رحت و اخذت حبتين بنادول نايت و لااا نفع و جلست صااحي الين صلاه الفجر و ما نمت الا بعد الصلاه .. قمت بعدهاا بسااعتين على سبعه الصبح و متعب و جلست افكر اكنسل و الا لاا .؟ اروح اسويهاا والا لاا ؟.
جلست الين السااعه ثمانيه و ان ما غير اتقلب و افكر.. قلت تدري قم بس رح يارجال وشف وش يبي يصير مع الدكتور ...
