يسعدلي اوقآتكم جميع ,,
حبيت اعرض لكم تجربتي عند الدكتور بسآم جباعي أعتذر اني نزلتها متأخر الوقت تو يصفآلي
طبعا معرفتي بالدكتور كانت من خلال هالمنتدى الا لولاه كان ماتشجعت ولا فكرت ابد اسويها
ومن بعد النتائج والقبول من تجاربكم عقلتها وتوكلت ,,
راسلت الدكتور بالايميل وشرحت له حالتي وارفقت له صور للمنطقه الخفيفه عندي وهي المنطقه الاماميه بس شعري من الجوانب ومن الخلف كثيف وزين مافيه اي مشكله حجزت الموعد وكان بتاريخ
21/3/2011 طبعا بما اني من الكويت جيت قبلها بيوم وكانت زيارتي الاولى للدكتور شاف شعري وسألني عن حالاتي المرضيه لأني أعاني من خمول الغده الدرقيه وتكيس في المبايض مسبب لي لخبطه في الدوره الشهريه وقالي الدكتور بسام ان هذا هو السبب الرئيسي لتساقط شعري
المهم قرر لي 1800 غرزه (( 4500_4000)) وطلع لي السعر بعد الخصم 15800 وقعت عالاوراق
طلعت من العياده وعلى طول للسوق لازم استغل وجودي في الرياض
رجعت تعبانه وعلى طول نمت .. صحيت الساعه 8 واخذت دش منعش وتريقت ريوق خفيف
وعقبها حركنا للعياده كان معاي اخوي فديته وامي ..
اول مادخلت العياده دفعت المبلغ وقعت على اوراق وقبل مايدخلوني داخل حبيت راس امي وقلت لها كل عام وانتي بخير طبعا امي استغربت قالت بسم الله عليج وش فيج يابنت مضيعه ههههههه
قلت يمه اليوم عيد الام
طبعا امي خايفه اكثر مني لبى عينها قالت روحي والله انج فاضيه ...اخذت الممرضه وزني وقاست ضغطي لبست اللبس واخذت الحبه ودخلت للغرفه ..
طبعا من دخلت وانا متبلدة الاحسآس لاني خايفه ولا متوتره تقول هاذي داخله تشوف لها فلم بس
بدا الدكتور بأخذ الشريحه وانا سااااااكته يقولي تكلمي قولي اي شئ وانا سااااااكته قال بردانه هزيت راسي لحفوني يقول سولفي علينا سلينا واحنا نشتغل وانا عمك اصمخ ساااااكته
اخذنا بريك وبدوا الممرضات شغلهم في التقطيع وانا مازلت ساااااااااكته
في هالوقت عالساعه 12 امي واخوي كانوا بيرجعون للفندق وهي قريب من العياده بنفس الشارع
قبل مايطلعون راح الدكتور لأمي وجابها عندي بالغرفه تشوفني وتطمن علي ..
قبل مايبدي الدكتور في المنطقه الاماميه اقترح علي انه يحلقها انا حزتها بدا فيني الاحساس وخفت وترددت
بدا يقنعني راح تكون النتيجه احسن والكثافه تكون عاليه وهي مره بالعمر قلت اوكي حلقها وبدا في التخدير والغرز انا هني ماحسيت بنفسي واخذت لي غفوه صحيت عقب ماخلص الدكتور
اخذت عقبها بريك تغديت وعقبها بدوا الممرضات شغلهم ..والدكتور ماخلاني ابد كل شوي يطل علي .. خلصت الساعه 4 ونص وكانت النتيجه بصراحه روعه
وقتها عطاني الدكتور بعض التعليمات في الصلاه والنوم وهي طبعا نفس تجاربكم ماتختلف عنها بشئ اخذت الادويه هاذي ..
طبعا العلاج اللي استمر عليه هو الدينا35 وهي لتنظيم الدوره وعلاج الغده والبخاخ بس غيرها ماوصف لي شئ لمدة 6شهور ,,
عقب ساعدتني الممرضه باللبس وطلعت للفندق ماحسيت بالم بس شوية صداع ,,
ليلتها ماعرفت انام كلش علي ظهري مو متعوده كلش عقب معاناه نمت على جنبي
اليوم الثاني الظهر صحيت وكان الوضع تمام الحمدلله بس حسيت بالشد أكثر من امس طلعت للعياده غسلت شعري وعلمني شلون اغسله وبما ان شعري طويل تلعوزوا في الغسل ..
بعد العياده طلعنا تغدينا واخذنا فره بالرياض ومرينا كم محل والوضع عادي جدا وعقبها رحنا المطار وكانت رحلتنا عالساعه 6 المغرب ,,
الصراحه تنقال الدكتور كان راقي جدا ومنصح في التعامل الشغل نظيف والعياده مريحه واهتمامهم فيني ممتاز ماحسيت بألم بالمره بتاتاً البته
طبعا بعد مارجعت الكويت صار فيني شوية انتفاخ عند خشمي بس
مدري ليه تسلط في هالمكان وثاني يوم اختفى ,, اخذت اجازه لمدة شهر مع ان اسبوعين تكفي بس حبيت ادلع نفسي شوي وارتاح ,,
من يومين رحت لدكتور جراحه عندنا بالكويت علشان افك الغرز وكان متعجب يقول الدكتور اللي سوالك العمليه باينته محترف قلت له ليش قال لأن الخياطه مو مبين لها اثر والشعر من قدام رسمته كثير حلوه ...
حاليا بدت القشور تنشف وتطيح وانشاءالله يتمها على خير ولا يضيع لنا تعب ,,
كان بودي انزل صور بس تعرفون بنت وصعبه اكشف عن شعري ,,,
هاذي كانت تجربتي والشكر للقائمين على هالمنتدى ولأعضاءه اللي افادوني بتجاربهم
ونصآيحهم الثمينه ,,,