طلعت نتيجة التحليل أرجو الدخول لاهنتو؟

اذكر كنت بنفس حالتك لما رحت للدكتور ووصف لي مينوكسيديل والزنك

بأول سنه كان فيه تحسن وبعدها بدأ يقل تأثير المينوكسيديل ورجع التساقط بقووه

والحين عندي مطـار محلي مابعد وصلنا للدولي باقي شوي شعر لكن منطقه التاج عندي واااضحه جدا والامامي خفيف

التساقط اللي عندك واضح من الصور انه وراثي حتى بدون الحاجه للتحليل اللي اعتقد انه مضيعه للجهد والمال ولكن لايمنع انك تتأكد


ولايوجد علاج للتساقط الوراثي الا >>> 1 - المينوكسيديل 2 - البروبيشيا معتمده عالميا كعلاج للصلع
وومكن تضيف عليها فيتامينات مفيده للشعر وشامبـو ولكن لاتعتمد عليها لوحدها ماراح تفيدك بدون المينوكسيديل والبروبيشيا

هاذي وجهه نظري من واقع خبرتي ومعاناتي مع هذا المرض اللعين اللي نكد علي حياتي

نصيحتي لك

1- حلق مكينه رقم 12 << غير ضروري ولكن يخفف من الضغط شوي ومنظر الشعر يصير افضل وكل ماقل الشعر يصير الصلع غير واضح
2 - استخدم المينوكسيديل ( رغـوه ريجين ) منتج امريكي مرتين باليوم صباحا ومساء - تحصلها في صيدليه العنايه بالجلد بالرياض
3 - حبه بروبيشيا 1 ملم جرام يوميا تحصلها في ادمه والصيدليات الكبيره
4 - حبوب بيوتين تحصلها في ارمـال او ممكن تحصلها في آدمه
5 - نـام 8 ساعات ليلا وكل اكل صحي خضروات وفواكــه وبروتين
6 - حاول مارس الرياضه يوميا كـارديو
7 - ابعد نهائيا عن الضغوط النفسيه

بالنسبه للزراعه عندك اكثر اختيار

1 - تزرع الآن وبدون استخدام للادويه وتعيش حياتك عادي ( فيه احتمال يستمر التساقط وتحتاج عمليه ثانيه وفيه احتمال تصير معجزه يستقر التساقط ويخف وماتحتاج عمليه اخرى يعني انت وحظك مافيه اي دكتور بالعالم ممكن يحدد متى يوقف التساقط )

2 - تزرع الآن مع استخدام الادويه (مينوكسيديل وبروبيشيا ) للمحافظه ع الشعر الغير مزروع وممكن بعد فتره طويله تحتاج عمليه ثانيه ( ممتازه ونتائجها رائعه )

3 - تنتظر حتى يستقر التساقط الى بعد الثلاثين وبعدها تسوي عمليه زراعه

ملاحظه اخيره -- البروبيشيا ممكن تسبب برود جنسي وضعف انتصاب للبعض بنسبه 2 الى 4 % ويفضل تستشير الطبيب قبل استخدامها مع انها تصرف بدون وصفه ولكن احتياطا اسأل الطبيب


و بما ان الصلع مأثر عليك نفسيا ومضيق صدرك انا شخصيا انصحك فيها لانها افضل علاج للصلع ونتائجها مذهله ولكن يعيبها الاعراض الجانبيه اللي ممكن تحصل لك وممكن لا

وانا نادم اني ما استخدمتها من البدايه ما عرفتها الا بعد فوات الآوان لكن بمثل حالتك في بدايه الصلع بتعطيك نتائج ممتازه بأذن الله

آسف ع االاطاله ان شاء الله اكون افدتك وبالتوفيق لك ...

أخوي SkoOoN AlGaR7 الله يحييك وبيض الله وجهك على الشرح المفصل اللي اثلج صدري وتفاعلك معي انت والاخوان جميع والله شوف وانا اخوك ان من النوع اللي لو تقولي حلق شعرك ع الصفر او مكينه اقل درجة أحس انها صعبة علي جدا ليش لاني من النوع اللي احب الشعر اذ اكان الحين فاقد لي الاف الشعرات فما بالك اذا ناظرت المرايه والسواد اللي براسي اختفى راح اتعب كثير بس انا قبل شوي سالت الاخوان عشان العلاج يعني لو بستخدم العلاجات الله يعيني بحلق يعني لاجل صحتي بسوي المستحيل لكني احب اختصر على نفسي المشاوير الطويلة يعني بدال مااستخدم العلاجات واجلس سنه او انتظر الين يبن الصلع كله ولعمر معين افضل اني ازرع بصراحه وماعندي مشكلة ازرع مره اخرى بس اهم شي اشتري راحة نفسي واهم مافي الامر اطلع من الحالة النفسية اللي تعبتني وانا كل شوي احط شي براسي حتى لو طلعتي للبقاله يعني تاثرت كثير بس الحمد لله عايش حياتي ولاكان فيه شي بس من جواتي متاثر بصراحه الى الان ماشريت العلاجات الموصوفه لي من قبل الدكتور وجالس احلها واملها وبما ان رمضان اجازة طويله مع العيد وعندي فرصة في رمضان اخذ اجازة على الاقل يجي وقت الدوام وقد راحت الانتفاخات وراحت اشياء واجد من اثار الزراعة وعدى ع الزراعة اكثر من 20 يوم يعني اقدر امارس حياتي طبيعي افكر اني ازرع الحين لان مافيني حيل للادوية بصراحه وانا اعرف نفسي زين راح استمر شهر او شهر ونص وبعدها دورني المشكلة اللي مضايقتني اكثر وانا ذكرتها قبل شوي في احد ردودر على احد الاخوان اللي هي الجبهه كبيره شوي ودي اغطيها بس اللي ابي اعرفه الان لو فكرت ازرع وقررت خلاص اني اطلع تركيا هل اقدر اتفق معه ع السعر وانا هنا بالسعودية يعني السعر كامل عشان مااطلع هناك وينقص علي شي والا لازم اروح عندهم ويشوف راسي الدكتور عن قرب وبعدها يقرر ؟
تحياتي لك يالغالي اشكرك ع شرحك المطول .

اخوي ماشاء الله قصتك طوييييييييييييلة

الاخوة ماقصروا في الردود ،،

ولكن فقط اردت أن أضيف ان معضم اطباء الجلدية لا يفقهون شيئ عن زراعة الشعر ،، ولا تستغرب ان وجدت بعض الاعضاء أكثر معلومات عن زراعة الشعر من طبيب الجلدية

المهم اذا كنت تريد زراعة الشعر فالافضل استشارة طبيب مختص في زراعة الشعر فقط ،،

تحياتي ،،

__________________
أسْتَغْفِرُ اللهَ العَظِيمَ الَّذِي لاَ إلَهَ إلاَّ هُوَ الحَيُّ القَيُّومُ وَأتُوبُ إلَيهِ

والله يا اخوي نفس وضعي اذا طلعت اي مكان لازم شماغ او كاب وهذااااااا اللي مضيقني وامرضني انقطعت من اشياء كثيره بسبب الصلع مثلا لو بتروح استراحه ماهو معقول جلسه شباب وفله وكوره ومسبح وانت يابو الشباب مرسم خخخخخخخخخ ويييين عايشين واخوياك يتضايقون منك سواء بطلعه بر او استراحه او اي شي مغطي راسك يحسون في شي غلط وانك منت مرتاح وهالشي ينعكس عليهم
هو يا انك تكشف راسك وتعيش الحياه وتتحمل التعليقات اللي بتجيك (وهذا اللي ماقدرت اسويه ابدا) او تنقطع عنهم وبكل الحالات وضعك سيئ
المهم ان الصلــع اثر فيني جدا جدا وعشان كذا مقدر وضعك واعرف حجم المعاناه اللي ممكن يعانيها شاب بأول عمره بسبب تساقط الشعر

وصدقني وضعك حاليا جيد ومع الزراعه بيرجع شعرك مثل ماكان ان شاء الله ,, واذا تساقط الشعر الغير مزروع تفكر بعمليه ثانيه وتعيش حياتك طبيعي بدون مايأثر عليك الصلع اجتماعيا ونفسيا

ومن ناحيه الاتفاق على السعر طبعا ماتركب الطياره الا وانت مضبط امورك من السعوديه ومتفق ع السعر والاستقبال بالمطار وحجز الفندق وكل شي ,, في بعض المراكز مثل ماجيك هير و cerve وتايفون السعر بالجلسه بغض النظر عن عدد البصيلات مثلا تكون الجلسه بـ 1800 يورو او 2000 يورو

وبعض االاطباء المشهورين يحسبها بعدد البصيلات يعني البصيله الواحده بـ 2.5 يورو عند اردوغان
او عند الدكتور قيصر 3 يورو طبعا سعر غالي لكن شغل احترافي وممتاز

وتقدر تتواصل مع المراكز او الدكاتره وترسل صورك وهو يوضحون لك كل شي بالتفصيل كم بصيله تحتاج والسعر

نصيحه : لا تستعجل بالعمليه وخذ وقتك بالبحث عن الافضل ليش ؟؟ لان العمليه تجميليه بمعنى مافيه خط رجعه والبصيلات اللي ياخذونها من راسك ماراح ترجع وانت من الاساس متكدر وضايق خلقك ماعندك استعداد لتقبل عمليه فاشله
ابحث بالنت وشوف تجارب قبل وبعد بالمنتدى هذا وغيره وتأكد من خبره الدكتور وعدد العمليات اللي سواها
ولاتغرك الاعلانات والخرابيط اللي تشوفها لازم تشوف تجارب حقيقه لاشخاص عاديين
ولعلمك تركيا من اكثر الدول بالعالم في مراكز زراعه الشعر فيها السيئ والجيد تأكد انك تختار الافضل

واذا بتسألني عن رأيي في دكتور او مركز معين ما اقدر احدد لك 100% لاني مازلت في مرحلـه بحث وانتظار امور ماديه واشياء اخرى وناوي ع العمليه مستقبلا

وبالتوفيق لك ياغالي ....

هلا اختي وداد تري القصه مختصرها وكاتبها وانا بالمكتب وعندي ناس بعد كيف لو اني جالس بالبيت ومروق كان كل الاعضاء بيكرهوني من طول القصص الي بسردها لهم بيقولون ذا يكتب معروض شكوى هههههههه:d والله مااخفيك اني كنت حاس ان ماعنده سالفه بالذات بعد ماقالي مايبغى لك زراعه والمصيبه الاكبر ان الصلع اللي عندي وراثي حسيت ماهو واثق من كلامه معي هذا اللي استشفيته منه والله اعلم ماابغى اظلم الشايب لانه شيبه هو ولكن ربك يعين .

مشكورة اختي .

حياك الله يالغالي
والله انك جبتها بالنسبة للاستراحه انا صارت معي جيت مره كاشخ ع الاخر وكنت حاس انه بيلجقني كم كلمه بس قلت ماعليه والله ماجلست الا وهاتك من اليمين واليسار حتى ماالحق ارد عليهم من كثرهم ههههههههه وبعدها جلست فتره اتواصل معهم من دون شماغ ولا كاب الين انقطعت عنهم بالمره وبصراحه زعلو علي ع بالهم متغلي خخخخخ اما على طاري الكاب والاستراحه جيت اسلم على واحد منهم خدادي طبعا من غير قصد صك الكاب في وجهه الضعيف قال ياليتني ماسلمت عليك هههههههه يالله ايام وراحت والله كنك تتكلم عني بالنسبة للزراعة حلو طالما سعرهم ثابت بصراحة انا ارتحت للدكتور تايفون لاني شفت عملياته في بعض الاعضاء اعجبتني نتائجهم واللي اعجبني ايضا الدكتوره قونيز شفت واحد من الاعضاء مسوي عندها بصراحه ابداع شغل نظيف وهذا رابط عيادتها http://www.erahair.com/en/index.htm وفيه ايضا محمد جوتشلو بس اللي ارتحت لهم تايفون والدكتوره قونيز لان لي فتره احوس في تجارب الاعضاء مايقارب شهر انا بصراحه مو عجلة مني بقد ماهو تشجع مني بالزراعه بعد ماشفت الاخوان زرعو والشي الثاني فرصتي الان اخذ اجازه رمضان كامل لان مع بداية العام مايمديني اخذ شهر الين نهاية العام وبصراحه مافيني حيل اصبر ودي اتكي في المكتب ومن قوة الثقة اشيل الشماغ ولافكرت وعندي مبلغ الان ان شاء يكفي حق الزراعه ماودي اضيعه على كل حال بيض الله وجهك وان شاء تهون وانا اخوك لاتشكي لي فابكي لك انت شد حيلك وازرع وان شاء اللهه ان كان اني عزمت جبت لك العلوم كلها بس هل فيه يفيدني بارقام تايقون او المنسق ان صح التعبير عشان اسالهم واشوف وش علمهم .

تحياتي لك يالغالي .

هلابك اخوي التحسن هو زيادة الكثافه بشكل ملحوظ بنسبة40٪ التساقط خف بشكل كبير ولله الحمد نصيحة اخ لاتضيع وقت وابدا باستخدام المينوكسيديل حتى لوكنت مفكر بالزراعه لان شعرك الان عرضة للتساقط الكلام عن تجربة من اكثر من سنة ونص
سم بالله وتوكل عليه وابدا.............تحياتي

بيض الله وجهك لاهنت اخوي والف شكر ع النصيحة .