السلام عليكم ورحمة الله وبركاته
مشكلتي مثل الأغلبية هنا جبهتي كبيرة :d
الموضع موب صلع فجأة بس من انولدت وانا كذا بس ما قد حسيت ان جبهتي كبيره
رغم ان صوري وانا صغيره نص وجهي عبارة عن جبهه ماشاء الله وعااادي :d
لين مره وانا في المتوسط رحت مشغل وقالت جبينها كبير لازم غره وحقدت عليها! ههههه
وهذا حالي بفضلها من المتوسط وانا حاطه غره على جنب
وكنت لما ارفع شعري عند اهلي واقولهم جبهتي كبيره يقولون تبالغين ومافيها فكره
هذا كله وانا ما ادري اصلا انه فيه زراعة للمقدمة .. كنت احسب زراعة الشعر مع ورا أو داخل الشعر
أول استشارة لي كانت مع دكتور وليد الغالمدي في ادمه .. اسلوبه جميل ومحترم بس احبطني شوي لما قال احتمال كبير انها ماتضبط وارجع اسويها لك مره ثانيه وكرر جملته مرتين
طلعت من عنده وانا ما ارتحت أو ما حسيت بأي شي بمعنى اصح .. بس فجأة بعدها بفتره قلت بسويها ودقيت قالوا لي في اجازه وشلت الفكره من راسي كم شهر لما سمعت عن دكتور بسام
اخذت عنده موعد في شعبان واول ما رفعت الغره قال "اوف!" :d حسيت كأنه معطيني كف على وجهي :d
كنت متخوفة من سالفة البصيلات ومنظرها لأن اللي كان في بالي انها بتستمر ثلاث شهور .. بس قال كلها 10 ايام وما كأنك مسوية شي
قبل يومين تيسر امر هالعملية وجتني الشجاعة اسويها
رحت الساعة 9 قاسوا ضغطي ووزني وغيرت ملابس ودخلت
تعامل الدكتور مريح جدا ويطمن .. كل شوي يسأل ويسولف ويقولي بتحسين بشوية الم معليش وخبريني لو زاد
واذا بغيتي شي علميني لا تستحين .. والصراحة كل اللي معه كانوا كويسين
كنت متخيلة الالم بيكون كبير وقت العملية بس طلع اهون من اللي في بالي .. فيه الم بس عبارة عن وخزات
المزعج بالموضوع كانت الاصوات اللي اسمعها .. يعني الالم نفسي اكثر
خلصنا على الساعة 5 بالضبط
عطاني بنادول وبريدنيزولون وروكسل
الم الراس بعد العملية قوي .. ماقدت انام في الليل خايفة من الاحتكاك ومن كثر الشد ما قدرت
اشوف كثير معطينهم وسايد خاصه بس ما قالي عنها شي ولا عطاني
حذرني من اني انزل راسي لاي سبب وقالي راح يسبب لك انتفاخ .. وتشوفوني في البيت مشبصه كأني مسويه تسريحة وخايفه تخرب :d
اثناء العملية عطاني ابرتين وحده عشان الانتفاخ والثانيه ما ادري حقت وشو
الرسمة ماكانت مرضية بالنسبة لي بس نفس كلامه المعتادة عشان يبين طبيعي ولا تحكمين الحين اصبري
خلصنا العملية الحمدلله .. حسيت بدوخة خفيفة بعدها
ومن بكرا رحت غسلت شعري عندهم وعلمتني كيف امشطه واغسله
بس الغريب قالت حطي شعرك على ورى ولما سألتها ما اقدر انزل الغره قالت لا!
طيب كيف اروح للناس كذا؟ والى متى الاحمرار والشعيرات بتكون موجوده؟
بتطيح هالفتره والا تطول؟
ومتى اقدر انزل غرتي لأن ما كنت اقدر اعيش بدونها قبل الزراعة كيف بعدها ههههه
وهل الالم بيخف هاليومين والا اذا شلت الغرز؟ لأني باختصار ما انام ابدا من الالم !
وبالنسبة لغسيل البصيلات .. قريت انه فيه ناس تزيد الفرك كل يوم بس ماذكرت لي هالشي .. هل اغسله عادي والا ازيد القوه كل يوم؟
خوفتني يوم قالت الممرضه بتفك الغرز لأن الدكتور عنده مؤتمر .. عادي ؟ طمنوني
ادري اسئلتي كثيره بس متوتره وعلى اني قريت كثير احس فجأة ما اعرف شي
شكرا مقدما وادعولي
وأي سؤال عن العملية أنا حاضرة