زراعتي بكل تفاصيلها

السلام عليكم ورحمة الله وبركاته


عملت زراعة لفروة راسي من قدام (القذله) كلها فراغات وفالمناسبات كنت اغطيها بالبودره وفكرت فالزراعة يوم شفت صديقتي واختها تحمست واتصلت فالمركز وحجزت موعد استشاره والاستشاره مجانيه ورحت أنا وصديقتي وشاف شعري من قدام وقال محتاجه حوالي
1850 بويصله وقلت اوكيه وقالي مبلغ العمليه
بيكون
14000 الف درهم
وتوكلت على الله ودفعت 2000 وسوالي فحص دم
وعمليتي كانت بتاريخ 5/1/2015 قبل ثلاثة ايام والحمدلله العمليه جدا سهله وضحك وسوالف واكل ونوم وبس ههههه
اول شي سوولي اياه لبسوني لَبْس العمليات لونه وردي وبعدين خذوا صور والدكتور تم يخطط المنطقة اللي بيزرعون فيها
وعطوني حبة مضاد حيوي وحبتين صغار عباره عن منوم وتميت 5 دقايق
وقالولي يالله نشي حبوبه تسدحي على السرير قلتلهم بنام تراني قالوا لا بليز بس نص ساعه اللين مانسويلج بنج موضعي ونأخذ الشريحة ونسوي الخياطه بعدين خذي راحتك فالنوم هههههه
إبر البنج حسّيت فيها يعني مب الم هذاك الزود عادي لأَنِّي لاهيه وياهم بالضحك والسوالف
وماشاء الله عالدكتور شو أيده خفيفه ماحسيت يوم قَص الشريحة ماحسيت يوم سوى الخياطه على فكره يوم كان يسوي الخياطه المساعد شافني نايمه ماسك راسي عدل عن انزله ولا يستوي شي لا سمح الله هههههه هو قالي يوم نشيت من النوم
وبعدين بنجوا المنطقة المزروعه وخرموا الفروه عشان يبدوؤن يزرعون ويوم خلصوا لفوا راسي بضماد وييتهم اليوم الثاني وبطلوا الضماد ونظفوا المنطقة المزروعه وعقب نظفوا المنطقة المانحه وحطوا مرهم عليها وقالولي ثالث يوم غسلي شعرج بس صبي ماي بالكوب عالمنطقة المزروعه والمنطقه المانحه وشعرت من تحت غسيله بالشامبو وفركي المنطقة المانحه براحة إيدج بالخفيف وسويت كل التعليمات والحمدلله وقالولي استخدمي شامبو أطفال والشامبو اللي صارفيلج إياه بعد أسبوعين استخدميه الحمدلله
تجربه حلوه بالنسبالي وبتريا النتايج بفارغ الصبر

معلومات :

اسم المستشفى
كوزمسيرج فرع بوظبي الامارات

اسم الدكتور
الدكتور حسين ايراني الجنسيه

عدد المساعدين
المساعد محمود
المساعد روني
المساعده انجلي

عدد ساعات العمليه
من الساعه 8 الصبح الى
الساعه 1ونص الظهر

عدد البويصلات
1850 بويصله

وفراغ القذله
من صدمه عصبيه مريت فيها قبل 10سنوات وطاح شعري من قدام وما نبت الحمدلله



وعطوني ادويه مضاد حيوي استخدمه كل 12 ساعة لمده خمس ايام
وبعد عطوني دواء التورم اكله بعد وجبة الفطور لمدة خمس ايام
ودواء التحسس لمده عشرين يوم
ومنظف للمنطقة المانحة مع شاش ومرهم يوميا لمدة عشرة ايام
وعطوني اللي أقوي عن البندول أكله فالليل حبه عن اييني وجع فالمنطقة المانحه والخياطه
وعطوني شامبو وريجين استخدمهم بعد أسبوعين من العمليه وخلاص


الحمدلله اليوم الثالث وماحسيت في وجع ولا شي الايرانيين يعرفون يزرعون ماشاء الله
وأي سؤال أنا حاضره

صح نسيت قالي الدكتور حسين اذا حكتج المنطقة المزروعه ولا المنطقة المانحه اييب شاش وأخرسه ماي وأحطه عالمنطقة اللي تحكني واضغط عليه بالخفيف لا ألمسها بايدي يا شاش يا كلينكس

وقالي بعد اسبوعين يوم ببطل الخياطه عنج اذا تبين نسويلج تحليل دم ونأخذ المصل من الدم وندلك فيه فروة راسج يغذي الفروه بفكر اللين عقب اسبوعين ان شاء الله

الف مبروك اختي وان شاء الله تشوفي نتايج حلوة

مبروووك ان شاء الله تلاقي النتيجة اللي تعجبك وأكثر ياااارب